Teksa ishte nisur për në Kosovë, kryeministri Edi Rama ka gjetur kohën t’i dërgojë një video-selfie Ermal Mamaqit. Ky i fundit kishte falenderuar Ramën, në lidhje me premtimin e mbajtur të qeverisë për t’i dhënë një pension të posaçëm familjes së këngëtarit të njohur që u ndaj nga jeta, Doktor Florit.
Kreu i qeverisë shprehet se moderatori Mamaqi i cili njihet për afrimitetin me Partinë Demokratike, e “shkeli vijën e partisë”, duke ju referuar këtu faktit që pranoi se socialistët i mbajnë premtimet.
“Përshëndetje Ermal dhe përgëzime. Përgëzime se e shkele vijën e partisë, pranove të vërtetën gjë që bie ndesh me vijën e partisë tënde. Por fakti është fakt. Dhe sa për atë se sa i mbajmë ne socialistët premtimet, ja ku e ke dëshminë konkrete se për të tjerat edhe s’ta kërkon njeri por edhe ngenë s’e ke të thellohesh dhe të shikosh se në fakt premtimet e dhënë janë zotime të mbajtura. Ka zotime që mbahen më shpejt, ka që mbahen më ngadalë. Ka punë që mbarohen shpejt, si kjo punë e mirë që mbaruam sëbashku, ka punë që duan kohën e tyre. Por, në fund të ditës ke të drejtë, vota është e fshehtë dhe ti nuk je nga ata që nuk e gjejnë drejtimin e duhur… Përshëndetje dhe përshëndetje të gjithëve aty në studion tënde“, thotë Rama në mesazhin e tij.
Megjithatë në videon e mëparshme, Ermali tha se prapë nuk do të votojë PS-në.
Por, edhe për këtë Rama e ka një përgjigje: “Vota është e fshehtë dhe ti nuk je nga ata që nuk e gjejnë drejtimin e duhur…”
https://www.facebook.com/Ermal.Mamaqi.Official/videos
