Kërkimet e kryera në Belgjikë dhe në disa vende evropiane, si pjesë e dy hetimeve të kryera në Antwerp, çuan në gjithsej 17 arrestime mëngjesin e së martës. Hetimet kanë të bëjnë me organizata kriminale shqiptare aktive në sektorin e drogës, shkruajnë mediat belge.
Në Belgjikë u bënë 12 kërkime: në Antwerp, Hoboken, Merksem, Schoten, Saint-Nicolas dhe Wilrijk. Ato u kryen në bashkëpunim midis policisë gjyqësore federale dhe policisë lokale në Antwerp. Kërkime u bënë edhe në Gjermani, Francë, Itali, Holandë dhe Austri.
11 të dyshuar janë arrestuar në Belgjikë dhe 6 jashtë vendit, të cilët janë në pritje të ekstradimit të mundshëm drejt Belgjikës.
Kërkimet lejuan hetuesit të kapnin 100 kg drogë (kokainë dhe amfetaminë), armë zjarri, kimikate, jelek antiplumb dhe 265,000 euro para në dorë.
Pjesa e hetimit e drejtuar nga policia vendase ka në shënjestër një grup kriminelësh të dyshuar të specializuar në shpërndarjen e sasive të mëdha të drogës që më pas transportoheshin në vende të ndryshme me mjete të pajisura me hapësira të fshehta. Hetimi nga policia gjyqësore ka të bëjë me një bandë që mësohet se ishte aktive në importin e kokainës nga Amerika e Jugut dhe pastrimin e parave nga trafiku i kokainës.
