Avokati Kujtim Cakrani e ka cilësuar dhunimin e kolegut të tij Sokol Mëngjesit si një mesazh nga bota e krimit kundret gjithë sistemit të avokatisë.
Cakrani shtoi gjithashtu se zona e ish-Bllokut, ku u dhunua Mëngjesi, është ‘Kolumbia’ e Shqipërisë, pasi sipas tij, aty zhvillohen të gjitha pazaret mes mafies dhe politikës, prostitucioni, etj.
“Kjo nuk është e sotme, por e mbartur. Edhe Policia e Shtetit e trajton avokatin si një leckë. Që nga kryeministri edhe ministrat nuk kanë pasur një reagim solid dhe të ashpër. Dhe ministri i Drejtësisë ka patur një reagim me vetëm dy rreshta, duke iu referuar Dhomës Kombëtare të Avokatisë. Edhe ministri i Brendshëm ka pasur një reagim të dyshimtë.
Kjo është një goditje që i bëhet sistemit të avokatisë. Ngjarja ka ndodhur në zemër të Tiranës. Bllokun e quajnë sot Kolumbia e Shqipërisë. Aty bëhen takimet e mafies me politikën, prostitucioni. Dalja e tyre pa maska tregon se ata kanë dashur të thonë se ne nuk iu llogarisim.
Pra një sinjal që i jepet opinionit publik për t’i thënë goditini avokatët sepse janë mashtrues. Ne opinioni publik na anatemon. Thonë duhet varur në litar filani, pasi shikoni se kë mbron. Thoshin avokati duhet varur në litar. Kjo është një frylë anti-avokat nga sistemi komunist”, tha Cakrani në Euronews Albania.
