Inter po kalon një moment të vështirë dhe kualifikimi në edicionin e ardhshëm të Champions League vazhdon të jetë në dyshim.
Pas barazimit pa gola kundër Atalanta-s në transfertë, zikaltërit zbresin në fushë sonte, ku në “Giuseppe Meaza” presin Cagliarin. Një 90 minutësh që nuk duhet nënvlerësuar, duke parë dhe situatën që skuadra e Spaletti-t po kalon. Fitorja do të ishte një detyrim për Icardin me shokë, duke parë se Inter e ka humbur rrugën e golit, i cili ka munguar në tri ndeshjet e fundit.
Ndërkohë, objektivi i Cagliari-t është të largohet sa më shumë të jetë e mundur nga zona e rënies nga kategoria, e cila është 5 pikë larg.
Për sa i takon përballjeve direkte, Cagliari ka fituar dy ndeshjet e fundit të kampionatit që ka luajtur në shtëpinë e Inter, që ka fituar për herë të fundit një ndeshje të kampionatit kundër Cagliari-t në shtëpi në sezonin 2011/12.
Ndeshja mes Interit dhe Cagliarit do të luhet në orën 20:45.
