Kreu i Partisë Demokratike në Malësinë e Madhe, Fredi Stërkaj ka reaguar në lidhje me tritolin e vendosur mëngjesin e kësaj të premte pranë lokalit të tij në fshatin Ramëz.
Në një prononcim për mediat, Stërkaj ka mohuar se shpërthimi i lëndës plasëse ka lidhje me të. Sipas tij, tritoli ka shpërthyer në një parking publik në zonën e Ramzës, që nuk është pronë e tij.
Fredi Stërkaj ka deklaruar se nuk ka marrë asnjë kërcënim dhe nuk ka konflikt me askënd, teksa u ka bërë thirrje autoriteteve që të zbardhin ngjarjen.
“Lënda plasëse nuk ka lidhje me mua. Tritoli është vendosur në një parking publik i zonës së Razmës që nuk është pronë e imja. Nuk kam asnjë konflikt dhe ky shpërthim me lëndë plasëse nuk lidhet me mua. Parkingu është i shkëputur nga biznesi im dhe prona ime. Aty afër parkingut ndodhet vetëm një reklamë por është pronë publike e përbashkët. Nuk kam probleme dhe nuk kam patur asnjë kërcënim apo konflikte. Shpresoj që policia ta zbardh se me çfarë lidhet kjo ngjarje dhe të gjenden autorët.” – ka thënë Fredi Stërkaj për mediat.
Nga shpërthimi nuk pati persona të lënduar, teksa Policia po punon për identifikimin dhe kapjen e autorit/autorëve. Fredi Stërkaj ka qenë kryetar i komunës në Shkrel.
