Sikur të mos mjaftonte prodhimi i pakët, fermerët e qershisë në Mallakastër ankohen edhe për abuzim nga ana e tregtarëve me çmimin e shitjes së prodhimit.
Sipas fermerëve, tregtarët kërkojnë ta blejnë qershinë me 50 lekë për kg në pemë, ndërsa në tregjet e pakicës shitet minimalisht me 250 lekë të reja për kg, raporton Syri.
Fshatrat Drenovë dhe Kasnicë, janë dy nga fshatrat e Mallakastrës ku kultivohet masivisht qershi.
Ky vit nuk ka qenë jo i mbarë për prodhimin e qershive, pasi sipas fermerëve të zonës klima nuk ka qenë e favorshme.
Megjithatë, pemët nuk janë pa prodhim. Por fermerët e zonës tregojnë se edhe në këto kushte, nuk po arrijnë të shesin dot, pasi sipas tyre, tregtarët kërkojnë të blejnë qershinë me 50 lekë kg me shumicë, ndërsa në tregjet e pakicës shitet deri në 250 lekë kg.
Në të tilla kushte, një pjesë e fermerëve zgjedhin ta shesin vetë qershinë në tregjet e qytetit.
