Janë publikuar pamjet e kryeministrit të Sllovakisë Robert Fico të plagosur, pas momentit kur ai u qëlluar me armë zjarri nga një qytetar.
Në video shihet momenti kur kryeministri merret nga forcat e sigurisë dhe futet në makinën kryeministrore ndërsa ata që ndodheshin përreth duken të alarmuar.
Ngjarja ndodhi përpara një qendre të komunitetit kulturor në qytetin Handlova, ku ishte mbajtur një mbledhje e qeverisë. Handlova është rreth 180 km (112 milje) në veri-lindje të kryeqytetit Bratislavë.
Sipas gazetarëve në vendngjarje janë dëgjuar disa të shtëna.
Kryeministri sllovak Robert Fico u dërgua me urgjencë në spital dhe nuk dihet ende gjendja e tij, teksa i dyshuari u arrestua menjëherë nga Policia.
Ende nuk dihet identiteti i të arrestuarit dhe motivet pse ai qëlloi me armë zjarri ndaj kryeministrit sllovak.
