Çifti i moshuar i bashkëshortëve, Kosta Ilia 84 vjeç dhe Kleoniqi Ilia 88, janë gjendur të pajetë këtë mëngjes brenda banesës së tyre në fshatin Bodrishtë të Dropullit. Të moshuarit kanë pasur shenja dhune ne trup çka ka çuar fillimisht në dyshime se ata mund të ishin bërë pre e një grabitjeje.
Pista më bindëse ku janë përqendruar hetimet është ajo e krimit në familje ku besohet se dy të moshuarit janë konfliktuar me njëri-tjetrin dhe janë goditur mes tyre me sende të forta.
Ekspertët mjeko-ligjorë nga Tirana janë thirrur dhe priten përfundimet e analizave të ADN-së për të parë nëse ka pasur faktorë të jashtëm që kanë çuar në këtë krim.
Kosta Ilia ishte kthyer nga Greqia vetëm 5 ditë më parë ku kishte shkuar për të tërhequr pensionin.
Deklaratat e fqinjëve nuk janë të njëjta. Disa prej tyre pohuan se çifti jetonte në paqe dhe të tjerë folën për konflikte të dhunshme mes tyre falë problemeve të shëndetit mendor të Kosta Ilias i cili trajtohej vitet e fundit me medikamente.
Pensionet nga shteti grek ishin të vetmet të ardhura për ta.
