Ish-sulmuesi nigerian i Skënderbeut, Nnamdi Franklin Ahanonu, është bërë protagonist që në ndeshjen debutuese me ekipin e tij të ri Astana në Kazakistan.
22-vjeçari u aktivizua titullar në triumfin 0-2 që skuadra e tij e re arriti në transfertë ndaj Turan. Frenklin ishte protagonist te goli i dytë i shënuar nga Kamara. Gjuajtja e nigerianit që spikati te Skënderbeu, shkoi në shtyllë, duke u shndërruar në një asist për shokun e skuadrës Kamara që tundi rrjetën.
Franklin në këtë përballje qëndroi në fushë 70 minuta, duke bërë një paraqitje tepër dinjitoze në debutimin e tij me skuadrën e Astanës.
Rreth tre javë më parë, Nnamdi Franklin Ahanonu u transferua nga Skënderbeu tek Astana për shumën e 450 mijë eurove, që bashkë me bonuse mund të shkojnë në 600 mijë euro, por shifrat nuk janë konfirmuar zyrtarisht nga palët.
Franklin nuk qëndroi as një sezon të plotë tek ekipi korçar, ku regjistroi 18 prezenca me skuadrën e Gvozdenovic, 14 prej të cilave si titullar, duke shënuar dhe 9 gola. Statistika që kanë mjaftuar që kampionët e Kazakistanit, klub me buxhet të rëndësishëm, të shpenzojnë për ta bërë të tyrin.
Në videon e publikuar nga Franklin në Instagram mund të shihni goditjen e tij në shtyllë me ekipin e ri.
View this post on Instagram
