Pas operacionit në spitalin Amerikan, ka humbur syrin e majtë. Kjo i ka ndodhur një qytetari nga Vlora, i cili i tronditur tregon për TVA News “krimin” që i kanë bërë mjekët në spitalin e skandaleve.
Arjan Meçe rrëfen se pas një operacioni në spitalin Amerikan ka humbur shikimin në syrin e majtë dhe kjo i ka ndodhur vetëm një ditë pas operacionit. Qytetari tregon se ka kryer kontrolle në disa vende të Europës dhe ka rezultuar se syri ka marrë infeksion gjatë operacionit.
“Dua të bëj një denoncim për spitalin Amerikan, pasi në vitin 2018 kam shkuar atje kam bërë një vizitë, gjatë asaj periudhe më kanë informuar se do vijë një doktor nga Torino për të të bërë operacionin. Ditën që lamë operacionin, mbasi bëra pagesën poshtë te arka, më futën në sallë të operacionit dhe aty kuptova, që doktori nuk ishte, por ishte një doktoreshë që ma bëri gjilpërën. Kam ardhur në Vlorë pasdite. Ditën e nesërme kam shkuar në spitalin e Vlorës ku jam konsultuar me doktorin Mondin dhe aty ka ndodhur një, nga syri që pa doktori, dhe merr kontakt me drejtoreshën dhe i thotë ajo që të më nisë direkt urgjent në spital. Unë jam nisur nga Vlora në Tiranë. Në Lushnjë kam humbur shikimin te syri i majtë, gjithashtu edhe syri tjetër kishte probleme, por ndodhi sot për nesër. Shkova atje më mbajtën 12 orë shtruar në spitalin Amerikan. Nga ajo ditë e sot e kësaj dite s’kam pasur rezultat. Kam shkuar në Europë në disa shtete për syrin dhe nuk ka asnjë lloj zgjidhje, më thonë që ka marrë infeksion.” – thotë qytetari.
Arjani ka bërë kallëzim në Prokurori dhe këtu skandali bëhet më i madh. Çështja është mbyllur, pasi bashkia e Vlorës i ka thënë Gjykatës se në qytet nuk ekziston një person me këtë emër.
Thënë shkurt, askush nuk mund ta kallëzojë spitalin Amerikan dhe askush nuk mund të hetojë për këtë spital të lidhur ngushtë me qeverinë. Tashmë çështja është në Gjykatën e Lartë dhe qytetari kërkon drejtësi për rastin që i ka ndodhur.
