Pas tre orësh debatesh, socialistët kanë braktisur komisionin hetimor parlamentar për koncesionet në shëndetësi (sterilizimin dhe check up-i). Pas një pushimi prej disa minutash në mbledhjen e komisionit, anëtarët e mazhorancës kanë bojkotuar mbledhjen dhe nuk janë rikthyer sërish në sallë.
Kryetarja e komisionit, deputetja Albana Vokshi deklaroi se qëllimi i socialistëve është që të bllokojë punën, pasi nuk pranojnë që të miratojnë kërkesat për informacion, drejtuar institucioneve. Mbledhjen e radhës ajo e caktoi për ditën e martë.
“Po kërkojnë të mbulojnë korrupsionin dhe abuzimin kriminal të dy koncesioneve. E paimagjinueshme kjo që po ndodh në këtë komision. 8 deputetë e mazhorancës janë vënë në mbrojtje të këtij korrupsioni. Refuzojnë të dërgojnë kërkesat për informacion. Meqë deputetët e PS përsëri bojkotuan komisionin, u larguan për të penguar hetimin parlamentar, po thërras mbledhjen e radhës ditën e martë. Orarin do e caktojmë, rendi i ditës vijon të jetë miratimi i kërkesave për informacion dhe diskutim i planeve”, tha Vokshi.
Në rendin e ditës për mbledhjen e sotme ishte hartimi i planit të hetimit dhe miratimi i kërkesave për informacion, të cilat vazhdojnë të qëndrojnë të bllokuara prej deputetëve socialist. Por, diskutimet u shoqëruan vetëm me debate dhe jo me veprime konkrete.
Socialistët po vazhdojnë të refuzojnë dërgimin e kërkesave për informacion dërguar institucioneve, teksa 4 mbledhje rresht i bojkotuan dhe këtë pikë kanë refuzuar ta miratojnë si në mbledhjen e kaluar, po ashtu edhe sot.
Plani hetimor i opozitës parashikon që në listën e dëshmitarëve të thirret kryeministri Edi Rama, ish ministrat Beqaj e Manastirliu, ministrja Koçiu etj. Ndërsa mazhoranca ka propozuar që hetimet të shtrihen që nga viti 2009. Sipas PS-së duhet të pyeten edhe Ministrat e Shëndetësisë që nga dhjetori i 2006 si dhe të gjithë ish drejtuesit e QSUT që nga 1 tetor 2009.
Vokhsi ka deklaruar se opozita është e gatshme dhe se nuk e ka problem këtë gjë, por sipas saj, nuk e lejon kuadri ligjor i ngritjes së këtij komisioni, i cili parashikon si hetime që prej nisjes së dy koncesioneve që janë në fokus të komisionit.
