Tirana ka zhgënjyer në sezonin aktual i cili ka hyrë në fazën më të nxehtë të saj.
Bardheblutë edhe pse mbeten ende në lojë për të siguruar një vend në katërshen finale dhe më tej për të konkurruar për titullin kampion, nuk kanë bindur teksa paraqitjet e skuadrës janë karakterizuar nga paqëndrueshmëria e madhe në rezultat dhe lojë.
Për këtë arsye Tirana ka nisur të lëvizë “gurët” për sezonin e ri. Bardheblutë kanë menduar të “blindojnë” lojtarët që i konsiderojnë lider të skuadrës.
Florjan Përgjoni është i pari i familjes bardheblutë, të cilët mesa duket do t’i ofrohet rinovimi i kontratës.
Mbrojtësi pritet të firmosë shumë shpejt me kryeqytetasit kontratën e re, e cila pritet të jetë e vlefshme për 3 vite sipas shtypit të shkruar.
Kujtojmë se mbrojtësi lezhjan ka dhe një vit kontratë me bardheblutë, teksa me rinovimin do ta zgjaste atë deri në vitin 2027.
26-vjeçari është një nga lojtarët që në merkaton e verës dhe atë të janarit pati disa interesime dhe oferta, por siç duket palët kanë vendosur të vazhdojnë bashkëpunimin mes tyre edhe për disa sezone të tjera.
