Deputeti i Partisë Demokratike, Luan Baçi ka deklaruar këtë të martë, se mazhoranca braktisi Komisionin Hetimor për sistemin TIMS, pasi do që ky komision të dështojë.
I ftuar në rubrikën Opinion në News24, Baçi u shpreh se deputetët e PS e dinë se nëse Komisioni Hetimor zhvillon punën siç duhet, shumë njerëz nga radhët e tyre dalin zbuluar.
“Mazhoranca vonoi Komisionin Hetimor parlamentar për sistemin TIMS për 6 muaj. Mazhoranca do që ta dështojë Komisionin për TIMS. Fjala e z Gogu është provokative, gjithmonë ka dashur që të gricet me kryetarin e Komisionit Hetimor. Çdo veprim i tyre është provokativ, çdo marrje fjale e kanë të paramenduar, që të krijojnë një përplasje. Ata që në mbledhjen e parë provokuan, shantazhuan.
E ulën bisedën sikur janë në kafene, me qëllim që të zvarrisin mbledhjen e Komisionit. Mendoj se rezistenca e tyre është që të mos arrihet objektivi final. Ata e dinë se ka shumë fakte për këtë Komision Hetimor. Nëse Komisioni mbahet në mënyrë korrekte, dalin zbuluar shumë njerëz të mazhorancës. PS kishte disa kërkesa të kota. Kanë frikë dhe kjo duket qartë”, u shpreh deputeti Baçi.
