Fernando Santos nuk është më trajner i Besiktasit, ka bërë të ditur klubi nga Stambolli këtë të shtunë.
Vendimi u mor pas barazimit (1-1) në shtëpi ndaj Samsunsporit, rezultat ky që e rriti në pesë numrin e ndeshjeve të njëpasnjëshme pa fitore në Superligën turke.
Më parë, Besiktasi kishte barazuar me Basaksehirin dhe kishte humbur nga skuadra të tilla si Antalyaspor, Gaziantep dhe Galatasaray.
Fernando Santos mbërriti te Beshiktasi në fillim të janarit dhe largohet nga “Shqiponjat e Zeza” pas 16 ndeshjesh, në të cilat shënoi 7 fitore, 4 barazime dhe 5 humbje.
Ish-trajneri i Portugalisë dhe Polonisë e lë ekipin në vendin e 4-t në kampionat, në një kohë kur kanë mbetur edhe gjashtë ndeshje.
Serdar Topraktepe do të jetë trajneri i përkohshëm i Beshiktas deri në fund të sezonit.
Kujtojmë që në skuadrën turke luajne Ernest Muçi dhe Milot Rashica, që u aktivizuan titullar edhe në ndeshjen e fundit, por pa mundur të realizojnë.
