Mesfushori i Kombëtares Shpresa, Tim Civeja u bë protagonist ditën e sotme, teksa realizoi një gol mjaft të bukur me fanellën e Sarbrucken, në duelin e zhvilluar në transfertë ndaj Dinamo Dresden, ku skuadra e futbollistit shqiptar triumfoi me rezultatin 1-3.
22-vjeçari zhbllokoi sfidën në minutën e 30-të, ku me një të djathtë të kalibruar nga jashtë zonës, e dërgoi topin në cepin e portës, duke përshëndetur rrjetën e vendasve.
Ky ishte realizimi i tretë në 23 ndeshjet e kampionatit për mesfushorin shqiptar, i cili gjithashtu ka regjistruar edhe 3 asiste.
