Policia e Mirditës ka parandaluar një ngjarje të rëndë kriminale që do të kryheshin me mina me telekomandë, ku si rezultat ka arrestuar një person që po i transportonte.
Në kuadër të operacionit policor të koduar “Safe City 2” është vënë në pranga shtetasi Arili Kalija, 45 vjeç, lindur në Thumanë, Krujë.
Ai është kapur në hyrje të Rrëshenit, pas informacioneve të siguruara nga Policia e Mirditës se po transportonte mina me telekomandë nga Luar në drejtim të Rrëshenit.
Gjatë kontrollit fizik të ushtruar ndaj 45-vjeçarit, uniformat blu i kanë gjetur:
- 4 mina me telekomandë te lidhura me aparat celular me lëndë të dyshuara eksplozive;
- 3 kallëpe lënde të dyshuar eksplozive me kapsollë dhe fitil;
- 3 kapsolla të lidhura me fitil;
- 2 kallepë të tjera lënde të dyshuar eksplozive.
Ndërkohë, në vijim të veprimeve, gjatë kontrolleve në banesën e vjetër të babait të shtetasit të arrestuar, në Lurë, Dibër, shërbimet e Policisë gjetën në banesë dy armë zjarri, lëndë eksplozive si ajo që ishte montuar në minat me telekomandë, 10 ndezësa granatash ofensive/defensive, 10 kapsolla detonatore, dhjetëra metra fitil zjarrpërcjellës, si dhe qindra fishekë luftarak.
Policia bën me dije se ky operacion është në vijim të operacionit të regjistruar në muajin Janar, ku në hyrje të qytetit të Rrëshenit u kap 28-vjeçari Marian Gjoka, ku në çantën e shpinës iu gjetën dy mina me telekomandë me lëndë plasëse C4”.
Policia raporton se strukturat hetimore të Komisariatit të Mirditës, në bashkëpunim me Prokurorinë, vijojnë punën për zbardhjen e plotë të rrethanave të këtij rasti, si dhe për identifikimin dhe arrestimin e shtetasve të tjerë të përfshirë në këtë veprimtari kriminale.
