Policia ka arrestuar 3 persona të shpallur në kërkim për veprat penale “Ndihma për kalim të paligjshëm të kufijve” dhe “Prodhimi dhe shitja e narkotikëve”.
Në pranga ka rënë B. R., 38 vjeç, banues në Lazarat, pasi më datë 14.10.2019, Gjykata e Gjirokastrës e ka dënuar me 1 vit e 10 muaj burgim, për veprën penale “Ndihma për kalim të paligjshëm të kufijve”, A. R., 21 vjeç, banues në Lushnjë dhe Xh. Sh., 39 vjeç, banues në fshatin Krahës, Tepelenë, të akuzuar për prodhim dhe shitje narkotikësh.
“Në vijim të kontrolleve të imtësishme për kapjen e shtetasve të shpallur në kërkim, bazuar dhe në informacionet e siguruara nga inteligjenca policore në kuadër të megaoperacionit policor “Sundimi i ligjit”, specialistët e Seksionit për Hetimin e Trafiqeve të Paligjshme dhe Narkotikëve kanë ndaluar 3 shtetas të shpallur në kërkim, konkretisht:
-si rezultat i bashkëpunimit me shërbimet e Komisariatit të Policisë Pogradec është lokalizuar dhe kapur shtetasi B. R., 38 vjeç, banues në Lazarat, i cili ishte shpallur në kërkim pasi më datë 14.10.2019, Gjykata e Gjirokastrës e ka dënuar me 1 vit e 10 muaj burgim, për veprën penale “Ndihma për kalim të paligjshëm të kufijve”;
-si rezultat i bashkëpunimit me shërbimet e Komisariatit të Policisë Lushnjë është lokalizuar dhe kapur shtetasi A. R., 21 vjeç, banues në Lushnjë, i shpallur në kërkim në kuadër të operacionit “Delta”, i zhvilluar më datë 28.03.2024;
-si rezultat i bashkëpunimit me shërbimet e Stacionit të Policisë Memaliaj është lokalizuar dhe kapur shtetasi Xh. Sh., 39 vjeç, banues në fshatin Krahës, Tepelenë, i shpallur në kërkim në kuadër të operacionit “Furnitori”, i zhvilluar më datë 08.03.2024.”- njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
