Mesditën e sotme do të zhvillohen homazhet në nderim të dy pilotëve të FA, të cilët humbën jetën në krye të detyrës, ditën e djeshme.
Dy pilotët, kapiten Floran Deliaj dhe toger Donald Hoxha, do të nderohen nga zyrtarë dhe oficerë të lartë të Forcave të Armatosura në Pallatin e Kongreseve. Homazhet do të fillojnë në orën 12.00 dhe do të përfundojnë në orën 14.00.
Ndërkohë, rreth orës 14:30 do të zhvillohet ceremonia mortore tek Varrezat e Dëshmorëve, ku viktimat do të përcillen në banesën e fundit.
Komisioni Shtetëror për Dëshmorët shpalli “Dëshmor i Atdheut” dy pilotët e Forcave të Armatosura.
Helikopteri ushtarak u rrëzua mesditën e së mërkurës në ujrat e liqenit të Shkodrës pranë fshatit Grizhë të Malësisë së Madhe.
Nga aksidenti mbijetoi vetëm një nga tre personat që gjendej në bord, ushtari profesionist Gerald Baramuca, po merr mjekim në spital.
Prokuroria e Shkodrës ka nisur hetimet, duke ngritur një grup hetimor në lidhje me rrëzimin e helikopterit në Liqenin e Shkodrës.
Grupi hetimor drejtohet nga Prokurori Granit Shahu, i cili sëbashku me specialistët e tjerë kanë nisur hetimet për zbardhjen e rrethanave të rrëzimit të helikopterit ushtarak.
