Policia ka nisur hetimet ne disa pista pas djegies se një automjeti me targa italiane, dje ne Vlore. Ngjarja ka ndodhur në fshatin Bishan të Novoselës, ku u djeg një automjet tip “Audi A7”, në pronësi të Admir Malaj, i cili është shkrumbuar totalisht.
Sipas burimeve policore, pronari i automjetit dyshohet se merrej me trafikimin e lëndëve narkotike. Mësohet se Malaj kishte vetëm disa ditë që kishte mbërritur në vendin e tij të lindjes nga Italia, ku edhe jeton prej vitesh, ndërsa automjeti i tij luksoz është djegur plotësisht nga zjarrvënia.
Sipas burimeve nga grupi hetimor, pista e hetimit lidhet me aktivitetin e tij në shtetin italian, ndërsa po këto burime kanë saktësuar se Malaj dyshohet se merrej me trafikimin e lëndëve narkotike apo edhe transportin drejt Italisë. Kjo gjë mund të ketë sjellë prishje të pazareve, që ka sjellë dhe më pas zjarrvënien në makinën e tij.
Përveç pistës së hetimit që lidhet me aktivitetin e tij në shtetin italian, po hetohet edhe për ndonjë problematikë të krijuar kohë më parë në fshatin e tij të lindjes.
Sipas Policisë, Malaj nuk rezulton person me precedent penal, megjithatë grupi hetimor që po punon për zbardhjen e ngjarjes, nuk ka përjashtuar asgjë rreth hetimeve dhe pas dyshimeve se është i përfshirë në trafikimin e lëndëve narkotike.
“Më datë 09.04.2018, në fshatin Bishan ka marrë flakë automjeti tip ‘Audi A7’, në pronësi të shtetasit A.M., të cilin e kishte të parkuar pranë banesës”, bën të ditur Policia.
