Ish-polici i burgjeve, Gentjan Bejtja është ekzekutuar me armë zjarri pasditen e kësaj të premteje, në oborrin e banesës së tij, në Larushkë të Fushë-Krujës.
Rrethanat e krimit janë ende të paqarta, megjithatë mendohet se kemi të bëjmë me një atentat të mirëmenduar. Dyshohet se Bejtja është ruajtur nga autorët dhe është qëlluar teksa futej në banesë. Gentian Bejtja kërkohej nga policia për tu pyetur lidhur me atentatin e korrikut të vitit të kaluar, kur iu vra kunati Ramazan Sino, por nuk është arritur të lokalizohet nga uniformat blu.
Burime pranë grupit hetimor thanë se qitësit dyshohet të kenë qenë tre dhe kanë derdhur një numër të konsiderueshëm plumbash mbi objektivin, nisur nga gëzhojat e gjetura në vendngjarje.
Një automjet i djegur tip “Land Rover” fuoristradë është gjetur nga policia në fshatin Hasan, gati 5 km larg vendit të krimit. Në makinën që dyshohet se është përdorur nga autorët e vrasjes, janë gjetur katër kallashnikovë të djegur, konfirmoi policia.
Shkak i atentatit dyshohet se kaluara e viktimës. 42-vjeçari Bejtja u kishte shpëtuar deri më tani 3 atentateve.
Më datë 4 Korrik të vitit 2023, atij iu bë një atentat jashtë ambienteve të banesës, ku mbeti i vrarë kunati i tij Ramazan Sino, 29 vjeç dhe u plagosën Bejtja si dhe dy djemtë e këtij të fundit, 10 dhe 13 vjeç. Për ngjarjen, policia dyshoi tek Valter Bami, megjithatë ndaj këtij të fundit u ngrit vetëm akuza e armëmbajtjes pa leje. Bami qëndroi në qeli nën masën e arrestit me burg për 6 muaj. Më 18 Janar 2024, u la i lirë me arrest shtëpie nga Gjykata e Tiranës, për shkak të skadimit të afateve hetimore.
Më 9 Janar të vitit 2022, Gentian Bejtja i shpëtoi një tjetër atentati në afërsi të Niklës në Fushë-Krujë, ndërsa mbeti i plagosur miku i tij 31-vjeçar Klodian Stafuka. Të dy ishin në një automjet kur u qëlluan me armë zjarri. Ngjarja mbetet e pazbardhur.
Gentian Bejtja i shpëtoi po ashtu dhe një atentati me eksploziv të ndodhur në Shtator të vitit 2016, kur në mjetit e tij një sasi eksplozivi shpërtheu dhe e plagosi atë.
Bejtja rezulton person me precedentë penalë në fushën e veprave penale kundër personit dhe pronës, si dhe i arrestuar me arsenal armësh në banesë. Gentjan Bejtja, së bashku me Enver Stafukën (i rrëmbyer në vitin 2015) , ishin personat që vodhën makinën e përdorur për vrasjen e kryekomisar Dritan Lamajt, në shkurt të vitit 2013. Por me vendim të Gjykatës së Lartë, Betja dhe Stafuka u shpallën të pafajshëm më 13 nëntor 2013, pasi u vlerësua se nuk kishte prova të mjaftueshme për dënimin e tyre për akuzën e vjedhjes në bashkëpunim.
Bejtja është marrë në pyetje për disa vrasje të ndodhura në qarqet e Tiranës dhe Durrësit vitet e fundit. Ai është pyetur për vrasjen e biznesmenit të kromit Iliaz Çali, më 3 prill të vitit 2022 në autostradën Tiranë-Durrës; atentatin ku mbeti i plagosur Marklen Haka, më 8 qershor të vitit 2022, të cilit më herët në një tjetër ngjarje që synonte eliminimin e tij, i vranë gabimisht hallën; si dhe për krimin e trefishtë në mbikalimin e Fushë-Krujës më 17 korrik të vitit 2022, ku mbetën të vrarë, Brilant Martinaj (kushëriri i Ervis Martinajt) e dy miqtë e tij, Diklen Vata dhe Besmir Hoxha.
Bejtja është dyshuar si i përfshirë në disa atentate, si personi që ka nxjerrë në pritë viktimat, informator apo ndihmës i ekzekutorëve. Në media është raportuar se mes të tjerëve, Gentjan Bejtja ka pasur përplasje të forta me vëllezërit Valter e Durim Bami dhe Marklen Hakën, emra të njohur në raportimet e kronikës së zezë.
