Si dje, një vit më parë, jeta e Artan Cukut u pre në mes nga dora e një vrasësi me pagesë, që i kishte zënë pritë në hyrje të pallatit ku banonte me bashkëshorten e dy fëmijët.
Ish-drejtori i Policisë së Vlorës, u qëllua për vdekje mbrëmjen e 8 prillit 2017, teksa po ngjiste shkallët për të shkuar në shtëpinë e tij. Sot, një vit pas ngjarjes, duket se hetimet kanë ngecur vetëm tek ekzekutori, i cili në fillim rrëfeu ngjarjen e më pas u tërhoq duke mohuar gjithçka.
Në një moment, kur u mendua se grupi hetimor ishte shumë pranë identifikimit e arrestimit të porositësve të krimit të rëndë, duket se gjithçka ka ngecur aty. Personi që shkrepi armën e i mori jetën Artan Cukut, nuk pranon të bashkëpunojë me drejtësinë.
Nëse është thjesht paaftësi e organeve ligjzbatuese për ta bindur të bashkëpunojë, apo neglizhencë për ta çuar deri në fund hetimin, këtë nuk mund ta themi.
Por sot ka kaluar një vit dhe i arrestuari i vetëm për vrasjen e Artan Cukut, Mikel Shallari, jo vetëm që nuk është çuar për gjykim, por herë pas here kërkon lirinë, kur edhe ata që e porositën krimin vijojnë të jenë të lirë.
ARTAN CUKU IN MEMORIAM
Në kujtim të jetës së Artan Cukut, të shtunën u organizua një takim homazh ku ishin të pranishëm familjarë, të afërm, miq e kolegë të tij. Në sallën ku ishin mbledhur të pranishmit u shfaq edhe një dokumentar i titulluar “Artan Cuku in memoriam”, i përgatitur nga gazetarja Ardita Bala.
Vëllai, kolegët më të afërt, miq, gazetarë, ish-eprorë të tij dhe bashkëshortja, Marjola Cuku, treguan anën tjetër të Artan, atë që nuk e njihnim. Bashkëshortja e tij, e cila në një moshë fare të re, u detyrua të rrisë e vetme fëmijët, djalin dhe vajzën, tregon se janë kujtimet me Artanin ato që e mbajnë ende në këmbë.
“Ishte ai babai që kërcente me vajzën, vetëm për ta lumturuar. Ishte ai babai që e shijonte. Ashtu siç ishte energjik në punë, ishte shumë energjik edhe me fëmijët. E vetmja gjë që më mban në këmbë, janë këto grimcat që mundohem t’i bëj bashkë dhe të them që ne jetuam bashkë shumë fort, intensivisht, rrëmujshëm, çmendurisht, por jetuam”, shprehet Marjola në dokumentar.
Por edhe vëllai i Artan Cukut, Mentori, e ndjen mungesën e tij. Ndërsa tregon se pavarësisht se nuk ishte më pjesë e Policisë, ai nuk kishte frikë e nuk ruhej nga askush.
“E thoshte hapur: Nuk kam pse të kem frikë, se jam në të drejtën e zotit. E ndjej pa fund mungesën e tij”, shprehet vëllai i Cukut. Pas shfaqjes së dokumentarit, të pranishmit u njohën edhe me një libër dedikuar Artan Cukut, të ideuar nga ish-drejtori i Përgjithshëm i Policisë, Ahmet Prençi.
