Një person ka humbur jetën dhe dy të tjerë janë plagosur në dy ngjarje të ndryshme të ndodhura mëngjesin e kësaj të mërkure në Lezhe dhe Lushnje, ku është qëlluar me armë zjarri.
Në Lezhë, u plagos me armë zjarri pranë një shkolle fillore Agron Puka. Ndërsa në Lushnje, dy vëllezër qëlluan njeri-tjetrin me sëpatë dhe armë zjarri. Azis Musaj, 70 vjeç, humbi jetën, ndërsa i vëllai Nazif Musaj, 77 vjeç, mbeti i plagosur.
Atentati në Lezhë
Në fshatin Rrilë të Lezhës u plagos me armë zjarri Agron Puka. Atentati ndodhi rreth orës 08:00. Sipas një rindërtimi paraprak të ngjarjes nga policia, Puka sapo kishte shoqëruar fëmijët në shkollë dhe po kthehej në automjetin e parkuar aty pranë. Dyshohet se sapo është futur në makinë është qëlluar me armë zjarri.
Autorët mendohet se kanë qenë më shumë se dy, megjithatë, sipas të dhënave të para pranë grupit hetimor, vetëm një prej tyre ka shkrepur armën. Qitësi ka zbritur nga një “Audi” me ngjyrë të bardhë dhe ka qëlluar drejt makinës së 54-vjeçarit. Më pas, ka hipur sërish në mjet është larguar nga vendngjarja.
I plagosuri është dërguar në spitalin rajonal të Lezhës dhe sipas bluzave të bardha ndodhet jashtë rrezikut për jetën.
“Shërbimet e Policisë, me marrjen e njoftimin, kanë shkuar menjëherë ne vendngjarje, është rrethuar zona dhe janë ngritur pika kontrolli. Njëkohësisht, në ndihmë të Policisë vendore janë nisur Forcat Kombëtare të Sigurisë të Njësisë Shkodër. Grupi hetimor, në drejtimin e Prokurorisë, vijon punën për sqarimin e rrethanave të ngjarjes dhe për identifikimin dhe kapjen e autorit”, tha zyrtarisht policia në një njoftim paraprak për ngjarjen.
Pista kryesore e hetimeve është një konflikt fizik që Puka, i cili punonte në një fermë blegtorale në Balladre, ka pasur disa ditë më parë, bënë me dije policore.
“Boldnews” sjell edhe pamjet nga vendngjarja. Në automjetin tip “Audi” të Pukës dallohen shenjat e plumbave në xhamin e përparmë dhe atë në pjesën anësore të makinës, nga ana e pasagjerit.
Ngjarja pranë shkollës 9-vjeçare “Marash Gjoni” në Rrilë ka shkaktuar frikë te stafi pedagogjik dhe fëmijët kur kanë parë apo mësuar se çfarë kishte ndodhur pranë tyre, ndërsa mësimi u pezullua. “Ishte automatiku si me qenë në ’97 këtu”, tha për mediat një nga banorët e zonës. “Ky djali që e kanë plagosur është njeri i rregullt, familjar. Ndihen fëmijët të tmerruar. I morëm nga shkolla”, shtoi ai.
Skenën e ngjarjes e rrëfu për mediat një nxënës i shkollës. “U ndalën (autorët) me një Audi të bardhë. Zbritën… kanë ra plumbat për tokë. Audi ka shkuar deri te karburanti (pranë vendngjarjes) dhe më pas është kthyer me dyer të hapura dhe janë futur në makinë (autorët) dhe kanë ikur. Ne ishim në klasë. Kanë gjuajtur një karikator”, tha ai.
Vëllavrasja për pronën në Lushnje
Në fshatin Çukas të vjetër, në Lushnje, vëllezërit Azis e Nazif Musaj, përkatësisht 70 dhe 77 vjeç, janë konfliktuar mes tyre.
Sherri ndodhi rreth orës 8 të mëngjesit dhe sipas bluve, ka pasur si shkak mosmarrëveshjet që kishin palët për çështje pronësie. Konflikti mes vëllezërve degradoi në atë pikë, sa që sipas policisë, Azis Musaj ka goditur me sopatë vëllanë e tij Nazifin, ndërsa ky i fundit e ka qëlluar të parin me pistoletë.
Të dy u transportuan në spital për të marrë ndihmë mjekësore. Nazif Musaj u plagos me sëpatë në dorë dhe fytyrë, ndërsa vëllai i tij Azisi u plagosur me plumb në kokë edhe u transportua në gjendje të rëndë në spitalin e Traumës në Tiranës, ku edhe humbi jetën.
Arma e zjarrit dhe sopata, të përdoruara gjatë konfliktit, janë sekuestruar.
Nazif Musaj deklaroi për policinë pas ngjarjes se vëllai i vogël e ka goditur i pari dhe prandaj ai u detyrua ta qëllonte me armë zjarri. Sipas dëshmisë, ai donte të vriste dhe veten, por e pa që vëllai ishte gjallë dhe nuk e bëri këtë veprim.
“Vëllai më i vogël më goditi disa here duke më vënë poshtë. I gjendur në këto kushte nxora pistoletën dhe e qëllova. Kisha kohë që kisha probleme me të, kisha njoftuar dhe te policin e zonës. Pasi e qëllova me pistoletë doja të vrisja dhe veten, por e pash qe ai nuk vdiq dhe nuk e bëra këtë veprim”, mësohet të jetë shprehur 77-vjeçari.
I moshuari u arrestua në ambientet e spitalit ku po merr mjekim për veprat penale “Vrasja për shkak të marrëdhënieve familjare” dhe “Mbajtja pa leje dhe prodhimi i armëve, armëve shpërthyese dhe i municionit”.
Momenti kur Nazif Musaj shoqërohet në autoambulancë
