Tre ditë i ndajnë anëtarët e Partisë Socialiste t’i drejtohen qëndrave të votimit për një referendum partiak për mandatin e kryetarit. Deputetja socialiste Blerina Gjylameti bëri një një pasqyrë të përgatitjeve ku njoftoi se në votim nuk do të marrin pjesë ata që kanë hyrë në radhët e PS-së pas 31 dhjetorit të vitit 2015.
“Të 81.572 anëtarët do të votojnë në 383 qendra votimi. Për të qenë në përgjigje të problematikave që kanë zona të caktuara, apo njësi administrative të caktuara ku numri i anëtarësisë është më i madh, kemi ngritur edhe 15 qendra të tjera votimi”, tha Blerina Gjylameti.
Gjylameti i përgjigjet edhe akuzave të deputetit Ben Blushi, lidhur me moslejimin e vëzhguesve.
“Ndoshta është e vështirë, kur je vetëm 3 veta, të gjesh vëzhgues për 383 qendra votimi fikse dhe 15 të tjera që do të ngrihen. Vëzhguesit e Partisë Socialiste do të jenë atje dhe përsëri dua të siguroj se, mendimi dhe vendimi i çdo anëtari të PS-së do të jetë i shprehur qartë dhe, nga ana tjetër i numëruar qartë, sipas një procesi tërësisht transparent dhe demokratik”, tha më tej deputetja Blerina Gjylameti.
Qendrat e votimit do të qëndrojnë të hapura nga ora 08:00 deri në orën 16:00 dhe pritet që vetëm mesditën e së dielës të dilet me një rezultat përfundimtar. Në referendum duhet të marrin pjesë minimumi 51% e anëtarëve.
