Athletic Bilbao kalon në finalen e Kupës së Mbretit.
Pas fitores 0-1 në sfidën e parë mes skuadrave, baskët e drejtuar nga Ernesto Valverde triumfuan edhe në “San Mames” me rezultatin e pastër 3-0 ndaj Atleticos së Madridit.
Vëllezërit Williams ishin protagonistë absolutë të ndeshjes, duke mbyllur llogaritë e ndeshjes me nga një gol e një asist secili. Simeone provoi të shkundë madrilenët, por pa rezultat, pasi Bilbao gjeti edhe golin e tretë me anë të Guruzetas dhe vulosi përfundimisht kualifikimin.
Baskët konfirmohen kështu një ndër skuadrat eksperte të Kupës së Mbretit, pasi finalja e Sevillas do të jetë e 40 për ta në histori, teksa në 39 të parat kanë fituar 23 herë dhe kanë humbur 16 të tjerat.
Misioni i radhës i Bilbaos është të ngrejë lart Kupën që mungon prej 1984-ës, pasi 6 finalet e fundit radhazi kanë dështuar. Bilbao do të diskutojë trofeun me Mallorcën e Vedat Muriqit.
