Lajme të mira për Interin dhe sulmuesin francez të zikaltërve, Markus Turam. Ky i fundit la në mes ndeshjen ndaj Atletikos së Madridit për shkak të një dëmtimi muskulor, duke shqetësuar jo pak Inzaghin dhe tifozerinë zikaltër, megjithatë alarmi është fikur shpejt.
Mediat italiane raportojnë se Turam ka vetëm një tërheqje të lehtë dhe është ndalur në kohë për të mos rrezikuar një dëmtim më të rëndë, ndaj edhe rikthimi në fushë pritet brenda dy javëve.
Turam pritet të qëndrojë dy javë pushim dhe më pas të rinisë stërvitjen, teksa është e sigurt mungesa e tij në tri ndeshje të kampionatit, ndaj Leçes, Atalantës dhe Xhenoas.
Sulmuesi francez pritet të rikthehet pasditen e 10 marsit për të marrë disa minuta në transfertën emiliane ndaj Bolonjas dhe për të qenë plotësisht gati për sfidën e kthimit ndaj Atletikos së Madridit, e planifikuar për më 13 mars në “Uanda Metropolitana”.
