Minatorët kanë ndezur qirinj në shkallët e Ministrisë së Infrastrukturës dhe Energjisë në nderim të jetëve të humbura në galeritë e minierave.
Ata kanë protestuar ditën e sotme para Ministrisë së Infrastrukturës, duke kërkuar dhënien e statusit të minatorit. Minatorët mbanin pankarta në duar ku shkruhej “nëntoka ka nevojë për status”, “kujdes shëndetësor i veçantë për punëtorët e nëntokës”.
Minatorët shprehen se marrja e statusit të minatorit është një e drejtë e tyre. Ata thonë se ky premtim i pambajtur i qeverisë, ka lënë të zhgënjyer një komunitet të madh individësh që vijojnë ende këtë punë apo kanë qenë të punësuar në këtë sektor.
