Ka ndërruar jetë në spitalin e Traumës një prej personave që mbeti të plagosur, në aksidentin e regjistruar mesditën e kësaj të hëne në qytetin e Burrelit.
Burime bëjnë me dije se viktima është shtetasi Veli Bunga, 74-vjeç, i cili nuk ka arritur dot t’u mbijetojë plagëve të marra.
Mësohet se në gjendje të rëndë shëndetësore janë edhe mbesa e mitur e 74-vjeçarit si dhe shoferi i mjetit të Bashkisë, Përparim Nikaj. I plagosuri tjetër Xhelal Kola, mësohet se ndodhet në spitalin e Burrelit.
Ata u përplasën nga automjeti tip “Mercedes Benz” që drejtohej nga 28-vjeçari Ylber Xhepavdija. Sipas policisë dyshohet se drejtuesi ka humbur kontrollin mbi mjet duke dalë nga rruga ku fillimisht është përplasur me koshin e mbeturinave dhe ka marrë përpara katër personat që ndodheshin në trotuar duke i plagosur rëndë. Shofer i mjetit të pastrimit të Bashkisë dhe në atë moment po ndërronte gomën e mjetit.
Paraprakisht dyshohet se shkak i aksidentit ka qenë shpejtësia e lartë me të cilën lëvizte mjeti tip “Benz”.
Ndërkohë, banorë të zonës ku ka ndodhur aksidenti kanë pohuar se i riu ka bërë lëvizje me shpejtësi shumë herë para se të kishte përplasjen fatale me katër personat që ndodheshin në trotuar, por që nuk është ndaluar nga autoritetet.
