Mesfushori kosovar i Partizanit, Esat Mala, është përzgjedhur nga shoqata “Sporti na bashkon” lojtari më i mirë i muajit mars për Superioren. Pasi ka marrë këtë çmim simbolik, futbollisti kosovar u është përgjigjur pyetjeve të gazetarëve në konferencën për shtyp në ambientet e klubit të kuq. Mes të tjerash Mala thekson se mendon më shumë për të tashmen se për të ardhmen, ndërkohë që ka besim të madh për ta mbyllur kampionatin në vend të dytë: “Prej kur kam ardhur te Partizani, vetëm jam rritur shumë profesionalisht. Më kanë ndihmuar shumë stafi teknik dhe grupi i lojtarëve.
Ndihem shumë mirë dhe jemi në një etapë të re, në formë shumë të mirë. Personalisht, jam shumë i kënaqur, sepse nuk është e lehtë të jesh titullar te Partizani. Me besim dhe punë mund të arrihet gjithçka. Do të vazhdoj t’i vlerësoj minutat që më jep trajneri për të bërë më mirën time. Shtutgarti? Nuk është se di ndonjë gjë. Mund të them se jam i fokusuar vetëm te Partizani. Çfarëdo që të ndodhë, do të vendosin drejtuesit e këtij klubi, bashkë me mua. Po shoh të tashmen në këtë moment dhe jo të ardhmen. Mendoj se jemi kandidatë të fortë për vendin e dytë në kampionat. Objektivi ynë është Europa, që me shumë mundësi do ta arrijmë me vendin e dytë”-tha ndër të tjera talenti i Partizanit.
