Një punonjës policie është arrestuar për ngjarjen e djeshme në Kavajë, ku u qëllua me armë zjarri drejt një automjeti. Në pranga u vu nënkomisari Kastriot Gjongecaj, 54 vjeç, ndërsa u shpall në kërkim djali i tij, Denis Gjongecaj, 24 vjeç.
Sipas një rindërtimi paraprak të ngjarjes, ata janë konfliktuar me një 29-vjeçar pasditen e djeshme dhe kanë qëlluar me armë zjarri drejt automjetit të të riut.
Ndaj babë e bir janë ngritur akuzat për veprat penale “Vrasje e mbetur në tentativë” në bashkëpunim dhe “Armëmbajtje pa leje”.
“Arrestimi i N/komisar Kastriot Gjongecaj u krye pasi nga tërësia e veprimeve hetimore paraprake ka rezultuar se në bashkëpunim me shtetasin Denis Gjongecaj, 24 vjeç (djali i tij), më datë 08.02.2024, rreth orës 13:25, në lagjen Nr.2 të qytetit të Kavajës, janë konfliktuar për motive të dobëta dhe kanë qëlluar me armë ndaj automjetit me të cilin udhëtonte shtetasi K. K., 29 vjeç. Nga kjo ngjarje nuk ka patur të lënduar”, thuhet në një njoftim të Agjencisë së Mbikëqyrjes Policore.
