Paris Saint-Germain triumfon me rezultatin 3-1 ndaj Brest dhe kalon në çerekfinalet e Kupës së Francës, teksa miqtë e mbyllën këtu pjesëmarrjen në këtë kompeticion. Ndeshja dhuroi raste të shumta, me vendasit që diktuan ritmin e sfidës.
Ky takim u zhbllokua në minutën e 34’ me Mbappe që i dha avantazhin ekipit të PSG-së.
Vetëm tre minuta më pas ishte Pereira ai i cili gjeti rrugën drejt rrjetës dhe dyfishoi avantazhin e skuadrës së tij.
Miqtë provuan të reagonin dhe në minutën e 65’ Mounie shënoi për Brest, duke rihapur sfidën.
Megjithatë vetëm katër minuta më pas, Brassier bëri një ndërhyrje të gabuar ndaj Mbappe dhe mori kartonin e dytë të verdhë, duke lënë ekipin e tij me dhjetë lojtarë.
PSG-ja e shfrytëzoi superioritetin numerik dhe në minutën e 90+2’ Ramos realizoi golin e tretë dhe të fundit të kësaj ndeshje.
Kështu PSG-ja shkon në çerekfinale të Kupës së Francës, ndërsa Brest e mbyll këtu aventurën në këtë kompeticion.
