Personat që shihni në foton e mësipërme janë katër të rinjtë që u arrestuan në kuadër të operacionit policor të koduar “Lokacioni”, pasi u kapën në flagrancë duke shkëmbyer lëndë narkotike në parkingun e një qendre tregtare në periferi të Tiranës.
Në pranga janë vënë shtetasit: Demokrat Dylgjerit, 32 vjeç, Haziz Zylfa, 23 vjeç, Vladimir Kani, 23 vjeç, dhe Hyxhers Mete, 23 vjeç.
“Gjatë ndërhyrjes nga shërbimet e Policisë, këta shtetas janë kapur në flagrancë, në parkingun e një qendre tregtare në periferi të Tiranës, duke shkëmbyer dy qese plastike brenda të cilave kishte lënde narkotike kanabis, me peshë rreth 16.2 kg. Gjatë kontrollit të banesës së shtetasit Hyxhers Mete, në Korçë, shërbimet e Policisë së Korçës gjetën dhe sekuestruan, sasi lënde të dyshuar narkotike kokainë.” – thuhej në njoftimin e Policisë.
Burime bëjnë me dije se katër të arrestuarit janë nga qytete të ndryshme të Shqipërisë ku prej kohësh bashkëpunonin me njëri-tjetrin për drogat e forta dhe të lehta. Ata takoheshin në vende të ndryshme të populluara, duke shfrytëzuar edhe ambientet si qendrat tregtare, njëlloj si në rastin konkret.
Grupi kriminal ishte i sofistikuar dhe ruhej nga policia. Kjo për faktin që në takimet e tyre përdornin automjete të shumta, në mënyrë që mos të udhëtonin me një mjet të vetëm.
Demokrat Dylgjeri nga Elbasani figuron me precedent penal për armë, ndërsa Vladimir Kani nga Fushë Kruja i dënuar më herët për drogë. Edhe personat e tjerë gjithashtu me precedent penal.
Policia njoftoi se po punohet për identifikimin e shtetasve të tjerë të implikuar në këtë veprimtari kriminale.
