Kukësi ka mbetur pa trajner. Humbja e fundit me Dinamon, ka sjellë edhe largimin e trajnerit Stavri Nica, për herë të dytë. Raportimet e fundit thonë se skuadra ka zhvilluar ditën e sotme stërvitjen pa 69-vjeçarin.
Seancën stërvitore e ka drejtuar ndihmësi i Nicës, Oltion Kërnaja, i cili duket se ka marrë mbi supe përgjegjësinë e skuadrës në këtë moment delikat.
Drejtuesit tashmë po punojnë për të zgjidhur këtë situatë, teksa pritet në ditët në vijim për të mësuar se kush do të marrë sërish në dorë “frenat” e kuksianëve.
Kujtojmë se aktualisht Kukësi ndodhet në vendin e 9-të në tabelën e klasifikimit me 19 pikë të grumbulluara pas 21 ndeshjesh. Prej 11 javësh verilindorët nuk e njohin shijen e fitores në Superiore, duke bërë që skuadra të rrezikojë rënien në Kategorinë e Parë.
