Berisha: O sot o kurrë, koha që qytetarët…

Ish-Kryeministri Sali Berisha tha se mëngjesin e sotshëm në Tiranë nuk e ka ndeshur as në kohërat më të zeza të diktaturës. Berisha iu referua angazhimit të disa mijëra policëve të cilët vendosën në shtetrrethim zonën përreth Gjykatës së Tiranës ku u caktuan masat e sigurisë për 23 kuksianët e arrestuar pas protestës së të shtunës në Rrugën e Kombit. “E gjitha kjo sikur po gjykoheshin 23 super-terroristë, fallanga të Bin Laden dhe jo 23 qytetarë të Kukësit, heronj të vërtetë të protestës qytetare, të cilët janë rrëmbyer në mënyrën më terroriste në orën 2-3 të natës nga fallanga dhe kapuçonë të zinj të policisë, njerëz të cilët s’kanë qënë kurrë në protestën e Kalimashit, midis tyre prindër me katër fëmijë”, tha Berisha në një intervistë për INTV. Në vijim ai u shpreh se Edi Rama ka një urrejtje patologjike ndaj Kukësit. “Ka të trashëguar urrejtjen e të atit, me të cilin ai firmosi si xhelat ekzekutimin, varjen e birit të shquar të Kukësit dhe Shqipërisë, Avzi Nelës në gusht të 88. Rama mendon dhe e di që ai për Kukësin është një armik i egër dhe i betuar. Ai i vuri traun Kukësit, Tropojës dhe Hasit për të ardhur në kryeqytetin e tyre. Kjo situatë e bëri atë të humbasë çdo arsye. Ka tre ditë që sdi gjë tjetër vetëm të thotë që këtë taksë e nisi Berisha…”,  u shpreh ish-Kryeministri.