Një 37-vjeçar është arrestuar dhe një 29-vjeçar është shpallur në kërkim pasi akuzohen për vjedhjen e një banese momentalisht të pabanuar në Kuçovë, gjatë 4 ditëve të fundit.
A.S., 37 vjeç, u vu në pranga, ndërsa në kërkim u shpall V. N., 29 vjeç, të dy banues në Kuçovë.
“Këta shtetas dyshohet se gjatë periudhës 19.01.2024-22.01.2024, kanë vjedhur në këtë banesë, mjete për punë dhe 2 pajisje elektroshtëpiake, të cilat u sekuestruan nga shërbimet e Policisë. Vijon puna për kapjen e 29-vjeçarit, si dhe për zbardhjen e vjedhjeve të tjera që mund të kenë kryer këta shtetas. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme”, thuhet në njoftimin e bluve.
Në një video të publikuar nga policia shihen sendet e sekuestruara: një motoçikletë, një mjet bujqësor, një lavatriçe dhe një televizor.
