Një procedim administrativ ka nisur ndaj punonjësve të OSHEE-së, të cilët u filmuan duke marrë 2.7 milionë lekë të vjetra ryshfet nga pronari i një furre buke.
“Pas pamjeve të publikuara sonte në mbrëmje nga emisioni “Fiks Fare” në Top Channel, OSHEE Group ka marrë masat e menjëhershme për nisjen e procedimit administrativ ndaj dy punonjësit A.P dhe R.K, procedim i cili do të konkludojë në masa penalizuese (largim nga detyra), ndërsa rastin e dokumentuar do ta përcjellë për procedim penal”, njofton OSHEE.
“OSHEE Group shpreh gadishmërinë e plotë për të bashkëpunuar me organet ligjzbatuese për zbardhjen e plotë të përgjegjësive nga ana e dy punonjësve të saj dhe inkurajon të gjithë qytetarët që të denoncojnë në nr. 069 41 41001 çdo rast abuzimi me detyrën nga ana e çdo punonjësi të OSHEE group”, thuhet më tej në njoftim.
