Policia e Shtetit ka ekzekutuar fazën e dytë të operacionit policor të koduar “Tempulli” për të goditur shpërndarësit e lëndëve narkotike në të gjithë vendin.
Burime për mediat bëjnë me dije se janë lëshuar mbi 250 urdhër-arreste, ku pjesa më e madhe e tyre janë ekzekutuar natën e kaluar. Të arrestuarit shisnin drogëra të lehta dhe të forta në afërsi të shkollave, në lokale të natës dhe vende të tjera publike.
Mësohet se Tirana mban numrin më të lartë të të arrestuarve, ndërsa njëkohësisht operacioni është zhvilluar përgjatë mbrëmjes së kaluar dhe në Elbasan, Durrës, Shkodër, Dibër, Gjirokastër e të gjitha DVP e tjera të vendit.
Janë goditur kryesuesit e grupeve të shpërndarësve të cilët kanë operuar ndër vite në Tiranë e në rrethe. Ajo që vihet re është fakti se të arrestuarit kanë një grupmoshë relativisht të re, ku dominon ajo nga 20- 35 vjeç.
Policia ka sekuestruar kokainë dhe kanabis. Pritet një komunikatë zyrtare nga ana e Policisë në lidhje me këtë operacion.
