Janë publikuar pamjet shokuese të momentit 18-vjeçari nga Podujeva e Kosovës, Lulzim Fejzullahu, u përplas qëllimisht me makinë nga dy persona dhe më pas u dhunua për vdekje me shufra metalike.
Ngjarja ka ndodhur gjashtë ditë më parë. Lulzim Fejzullahu u dërgua për trajtim në spital, pasi mori lëndime të rënda dhe si pasojë e plagëve të marra 18-vjeçari ndërroi jetë të shtunën në QKUK.
Sipas mediave kosovare, dy të dyshuarit që e rrahën brutalisht 18-vjeçarin janë të miturit: E.K., 16 vjeç dhe A.A., 17 vjeç.
Për rastin ka folur edhe Prokuroria Themelore në Prishtinë.
“…lidhur me rastin e dt. 15 janar 2024, në Podujevë, ku pas një përleshje fizike, dy të dyshuar (të mitur) e kanë goditur me një shkop viktimën (tashmë të ndjerin, 18 vjeç), duke i shkaktuar lëndime trupore, ku si pasojë e këtyre lëndimeve të marra, viktima është dërguar në QKUK për trajtim mjekësor”, njofton Themelorja.
Prokuroria Themelore në Prishtinë po ashtu zbulon se po atë ditë me urdhër të Prokurorit të Shtetit, dy të miturit janë ndaluar për shkak të veprës penale “Vrasje në tetnativë” (tashmë vrasje).
“Brenda afatit ligjor, pranë gjykatës kompetente, prokurori ka kërkuar masën e paraburgimit për të dyshuarit, e cila është aprovuar dhe të dyshuarit aktualisht ndodhen nën masën e paraburgimit”.
Siç shihet dhe në videon e mëposhtme, Lulzim Fejzullahu fatmirësisht i shpëton pa lëndime serioze përplasjes nga makina, por më pas dy të miturit e godasin disa herë në kokë dhe trup me shufër metalike.
