Përfaqësues të OSBE-së në Tiranë janë duke zhvilluar paraditen e kësaj të marte një takim me bashkëkryetarin e komisionit të Reformës Zgjedhore, Damian Gjiknurin në Kryesinë e Kuvendit. Ndërkohë, në orën 14:00 është planifikuar një takim me bashkëkryetarin tjetër të komisionit të Reformës Zgjedhore, Enkelejd Alibeajn.
Këto takime vijnë një ditë pasi dy bashkëkryetarët e komisionit të posaçëm të reformës zgjedhore i dërguan një letër OSBE ku kërkonin asistencë me ekspertë në komision. Mandati komisionit të posaçëm të reformës zgjedhore përfundon në muajin mars.
Ajo që vlen të përmendet është fakti se shumica e grupit parlamentar të PD-së i ka kërkuar Kuvendit zëvendësimin e Enkelejd Alibeajt me Oerd Bylykbashin, por kjo kërkesë është rrëzuar nga mazhoranca.
Pavarësisht se OSBE ka kërkuar që diskutimet për reformën zgjedhore të jenë konsesuale dhe gjithëpërfshirë, duket se po përjashtohet një pjesë e mirë e opozitës dhe “zgjedhorja” pritet të ketë bashkëpunim veç me mazhorancën dhe grupit të Lulzim Bashës.
