Shtabi i Përgjithshëm i Forcave të Armatosura të Serbisë ka nisur një nismë për rikthimin e shërbimit ushtarak të detyruar, duke u kërkuar me ligj qytetarëve të shërbejnë për katër muaj.
Në lidhje me këtë, nga Departamenti Amerikan i Shtetit, kanë thënë se janë duke e vëzhguar nga afër situatën.
“Ne i kemi parë këto raportime dhe po e vëzhgojmë situatën nga afër. Ne mbetemi të përkushtuar ndaj stabilitetit rajonal dhe inkurajojmë vendet e rajonit që të jenë transparente në lidhje me politikat e tyre të sigurisë së brendshme”, ka thënë një zëdhënës i DASH për mediet kosovare.
Vlen të theksohet se ministri i Mbrojtjes i Serbisë, Milosh Vuçeviç, ka thënë para disa ditësh se Shtabi i Përgjithshëm i Ushtrisë ka nisur iniciativën te presidenti i Serbisë, si komandant suprem, që të hiqet vendimi për pezullimin e shërbimit të detyrueshëm ushtarak, me qëllim riaktivizimin sërish të ligjit që definon shërbimin e detyrueshëm ushtarak.
