Një ngjarje e rëndë ka ndodhur ditën e djeshme, ku tre shqiptarë janë dhunuar në Malin e Zi. Bëhet fjalë për shtetasit Klodjan Meaj, Azem Dervishi dhe Doris Kopaçi, të cilët janë dhunuar barbarisht nga një grup personash, që dyshohet se janë serbë të Bosnje Hercegovinës.
Menjëherë pasi kanë mbërritur në Shqipëri, tre shqiptarët e dhunuar u dërguan në spitalin rajonal të Shkodrës. Mjeku i urgjencës Astrit Lahi shprehet për News24 se dy prej të dhunuarve mbërritën në orën 6:00 të mëngjesit në spital me dëmtime të konsiderueshme në kokë dhe trup. Pasi janë kryer të gjitha kontrollet, janë larguar nga spitali rreth orës 9:00 pasi nuk kanë shfaqur probleme që mund t’u rrezikohej jeta.
“Njëri prej të dëmtuarve ka një plagë të sy ka një traumë por është ekzaminuar nga okulisti dhe nuk rezulton me dëmtime të thella që mund të rrezikojnë shikimin”, u shpreh mjeku Lahi.
Dy prej tre personave të dhunuar shoqëroheshin nga familjarë dhe të afërm gjatë qëndrimit të spital por edhe forca policie derisa janë larguar duke mos pasur probleme të rënda shëndetësore.
