Policia kufitare e Kakavijës ka sekuestruar rreth 190 bizhuteri të ndryshme floriri dhe argjendi, 2 monedha floriri, 1 orë dore e markës “Rolex” dhe çelësa për hapjen e dyerve dhe kasafortave, të cilat po dilnin nga Shqipëria.
Si rezultat janë arrestuar dy shtetas gjeorgjianë që kishin fshehur bizhuteritë në kroskotin e automjetit, të cilat dyshohen të jenë të vjedhura. Në pranga janë vënë shtetasit U. E., 32 vjeç dhe O. G., 36 vjeç, dy banues në Gjeorgji, të cilëve u janë sekuestruar dhe 6 mijë euro që i kishin me vete.
“Në bazë të analizës së riskut, në dalje të vendit, u kalua për kontroll në vijë të dytë, automjeti me të cilin udhëtonin shtetasit U. E. dhe O. G., në kroskotin e të cilit u gjetën të fshehura bizhuteri të ndryshme (50 unaza, 21 varëse floriri, 12 varëse argjendi, 13 byzylykë floriri, 6 byzylykë argjendi, 53 vathë floriri, 32 medalione, 2 monedha floriri, 1 orë e markës “Rolex”, 1 varëse me perla dhe çelsa për hapjen e dyerve dhe kasafortave). Gjithashtu, gjatë kontrollit në çantat e këtyre shtetasve u gjetën 6000 euro të cilat u sekuestruan në cilësinë e provës materiale, bashkë me bizhuteritë dhe çelësat.” – thuhet në njoftimin e policisë.
Uniformat blu njoftojnë se vijon puna hetimore për dokumentimin e plotë të veprimtarisë kriminale të këtyre shtetasve. Materialet procedurale i kaluan Prokurorisë së Gjirokastër për veprime të mëtejshme.
