Kryetarja e LSI Monika Kryemadhi ka deklaruar se forca politike që drejton do të kërkojë përjashtimin nga parlamenti të kryeministrit Edi Rama. këtë deklaratë e ka bërë për mediat pas mbledhjes së grupit parlamentar të LSI. Sipas saj Rama ka fyer rëndë jo vetëm qytetarët Shqipërisë, por dhe kosovarët.
“Çdo përpjekje e kryeministra për të delegjitimuar dhe për të kërcënuar protestuesit shkon në kurriz të gjithë shqiptarëve. Fjala e tij përpara shqiptarëve nuk është fyerje vetëm për veriorët por për gjithë shqiptarët. Ne sot distancohemi dhe dënojmë fjalorin prej një rrugaçi për vëllezërit tanë kosovarë. Në Kuvend ne do të kërkojmë përjashtimin e Ramës për këtë arsye, për sjelljen e kryeministrit për qytetarët. Thirrje prokurorisë të jenë të kujdesshëm dhe të zbatojnë ligjin. Ne po ndjekim situatën dhe opozita e bashkuar është në kontakt me protestuesit,” tha Kryemadhi.
Ajo theksoi se opozita e bashkuar do të nisë zyrtarisht këtë kërkesë, ndërkohë që la të hapur mundësinë e një bojkoti të jetës parlamentare. Edhe tre ditë pas protestës në tunelin e Kalimashit ku qytetarët shkatërruan zyrat e kompanisë konçensionare që vilte taksat për rrugën Durrës-Kukës, situate mbetet e rëndë. Aktualisht janë arrestuar 23 protestues, ndërsa 13 të tjerë janë shpallur në kërkim.
