Dinamo po vepron në qetësi të plotë në lidhje me merkaton e dimrit. Njerëzit që po merren me merkaton e “Bluve”, veçanërisht drejtori sportiv, Haris Fakiç, kanë kontakte të vazhdueshme me kandidatë për të veshur fanellën blu.
Deri tani nuk ka asnjë marrëveshje të mbyllur, por puna vazhdon dhe pritet që të ketë surpriza. Mësohet se një pistë për përforcimin e skuadrës është edhe mesfushori i Tiranës, Ardit Hila.
Emri i tij në fakt lakohet në shumë skuadra duke parë marrëdhëniet jo të mira mes klubit dhe lojtarit dhe në garë duket se janë futur edhe blutë. Hila është një lojtar me eksperiencë që trajneri Mehmeti e njeh mirë.
Përveç tij, për mesfushën blu është kandidat edhe Vesel Limaj, një tjetër lojtar i njohur në Superiore, ku ka veshur fanellat e Kukësit dhe Tiranës. Në merkaton e dimrit synohen goditje edhe për mbrojtjen dhe sulmin, që do ta kompletonin grupin për gjysmën e dytë të kampionatit.
Në anën tjetër, pritet që klubi të zyrtarizojë edhe mbylljen e bashkëpunimit me disa lojtarë që nuk janë më në plane. Gjoni dhe Ali Samake kanë ikur dhe e njëjta gjë pritet të ndodhë edhe me 2-3 lojtarë të tjerë.
