Banorët e apartamenteve të pallatit 12 katësh që u përfshi nga zjarri ditën e djeshme në Lushnjë do të akomodohen në konviktin e shkollës mekanike dhe në rast se do të jetë e nevojshme do të merren dhe banesa me qira, të cilat do të paguhen nga bashkia.
Këtë gjë e ka bërë me dije kryebashkiakja e Lushnjës, Eriselda Sefa, në një prononcim për mediat,ku tha dhe se aktualisht nuk ka asnjë qytetar në spital, pasi ata janë larguar tek të afërmit pasi morën ndihmën mjekësore.
Sipas saj, pas ekspertizës do të bëhet një vlerës i dëmit dhe të gjitha familjet do të kompensohen sipas ligjit.
“Të gjitha familjet që janë evakuuar dhe pasi morën shërbimin shëndetësor janë larguar tek të afërmit. Stafi i bashkisë po kontakton me çdo familje që do kenë nevojë për akomodim. Kemi bërë gatim konviktin e shkollës mekanike. Në rast se do jetë e nevojshme do marrim shtëpi me qira që do të paguhet nga bashkia Janë rreth 91 apartamente, por 20 janë banuese të tjerët janë emigrantë. Pasi të mbarojë ekspertiza bashkia ka detyrimin ligjor që banesave ti bëhet një vlerësim dhe më pas të bëhet kompensimi sipas ligjit”, tha kryebashkiakja.
