Kryerilindësi, në posedim të plotë të tepsisë, u tall rëndshëm me popullin e vet. E krahasoi me organin që nuk ngrihet më të thirrur. Por ndodhi që u ngrit atëherë kur nuk e priste. Dje, një popull i tërë u mblodh dhe ia dogji sportelet e taksës rrugore.
Dhuna ndëshkohet nga ligji. Prishësit e pronës do mbajnë përgjegjësi sipas ligjit. Punë e madhe. Burgu për burrat është.
Dhuna popullore erdhi si pasojë e dhunës fiskale rilindëse (e jo vetëm kjo) ndërsa shteruan mjetet paraprake. Në parlament rilindësit nuk pranuan korrigjim e taksës ndërsa nuk mund të bëhet apelim ligjor me një Gjykatë Kushtetuese inekzistente.
Dhuna fiskale rilindëse duhet ndëshkuar edhe më fort. Protestuesit e dhanë qartazi mesazhin. S’duhet e s’mund të zbatohet taksim i dyfishtë e artificialisht i rritur për të njëjtën gjë. Kjo vlen për “Rrugën e Kombit” e për çdo rrugë a vepër tjetër publike, kudo qoftë.
Rilindja u tërhoq pjesërisht. Premton përjashtim a lehtësim të banorëve lokale pa hequr dorë nga taksimi i dyfishtë dhe i rritur artificialisht. Rilindja nuk heq dorë nga dhuna pushtetore me tipare policore, mbarsur me krim e drogë. Është ngjizur e këtillë.
Koha do të tregojë shumë shpejt nëse populli do të kënaqet me kaq pak apo do të kërkojë deri në fund të drejtën e vet që, në rrethanat e dhëna, nuk arrihet pa spastruar një herë e mirë sëmundjen rilindëse që ka mbërthyer qeverisjen.
