Kreu i Partisë Demokratike, Lulzim Basha, në një dalje për mediat mbrëmjen e sotme apeloi përokurorinë dhe policinë të lirojë banorët e Kukësit të arrestuar për protestën.
Ai tha se Rama po përdor terrorin për të nënshtruar qytetarët e varfër që kërkojnë të drejtën e tyre ndërkohë që lë të lirë Habilajt dhe banda të tjera.
Basha: Prokuroria dhe policia patën një javë për të ndaluar dhe arrestuar trafikantin ndërkombëtar Arbër Çekaj që bashkë me pushtetarë socialistë trafikoi 613 kg kokainë kolumbiane dhe ata nuk bënë asgjë. As nuk e ndaluan, as e arrestuan por e lejuan të ikte i qetë nga Shqipëria. E njëjta opolici dhe prokurori dje ka mobilizuar brenda pak orësh qindra forca për të rrëmbyer në mes të natës nga shtëpitë e tyre qytetarët e thjeshtë të Kukësit vetëm se protestuan për mbijetesën e tyre dhe të fëmijëve të tyre. Kjo polici dhe prokurori që lë të lirë vëllezërit Habilaj, Klement Balilin, Orest Sotën, Agron Xhafaj dhe dhjetra kriminelë në kërkim kombëtar dhe ndërkombëtar mbrëmë pas mesnate u hodh me urdhër politik të Edi Ramës e armatosur dhe e blinduar kundër njerëzve më të varfër dhe më të shpërfillur të Shqipërisë. Aktet për të cilët akuzohen prortestuesit janë vepra të lehta penale, kodi penal parashikon nga gjobë deri në 3 vjet burg.
