Dedan Gjoni ish-oficeri i policisë që bashkëpunonte me kriminelet, dhe Dejvi Gjermeni qe mbante lidhjet e grupit kriminal me Gjonin dështuan me vetëdije planin për ekzekutimin e Xhevdet Plakut, ku ai ishte përfshirë. Abc News ka mësuar nga dosja hetimore se Dedan Gjoni ka komunikuar në WhatsApp me personat që do të kryenin vrasjen, të ndihmuar prej tij, dhe jo përmes telefonave të kriptuar.
Autorët nuk janë treguar të kujdesshëm për të mos lënë gjurmë të krimit që do të kryenin, pasi kishin bërë plan ta ekzekutonin Xhevdet Plakun sapo të dilte nga komisariati i policisë në Shijak.
Pasiguria e aplikacionit me të cilin komunikoi me Dedan Gjoni për planin e vrasjes si dhe vendi që autorët kishin zgjedhur për ekzekutimin e objektivit të tyre, e detyroi Dejvi Gjermenin të hiqte dorë në moment të fundit nga vrasja e Xhevdet Plakut, duke u thënë autorëve se ai ishte liruar nga komisariati.
Në dosjen hetimore thuhet se në 17 shtator të 2019-tës, Dedan Gjoni ka ndaluar në rrugë Xhevdet Plakun që lëvizte me një makinë të blinduar. Fillimisht ai nuk e ka njohur se kush ishte ky person, por pasi e ka shoqëruar në drejtorinë e policisë në Durrës, ai është prezantuar si Xhevdet Plaku dhe në kartën e identitetit njihej edhe me emrin Xhevdet azzis KISS. Ish oficeri kuptoi që personi që kishte përballë ishte hasmi i miqve të Dejvi Gjermenit, Algert dhe Rexhep Rapit.
Në këto kushte Gjoni, i dërgon një foto të Plakut, Dejvi Gjermenit që ndodhej në Holandë duke i treguar se do ta lironte në orën 20:00 të mbrëmjes nga dera e pasme e komisariatit. Por këto komunikime janë kryer në aplikacionin WhatsApp, pasi Dedan Gjoni, atë ditë nuk kishte me vetë telefonin me aplikacion “Enchro Chat”. Për këtë arsye, Dejvi Gjermeni ka informuar Algert Rapin, që së bashku me Rexhep Rapin i njohur edhe me emrin Kep Arapi ishin organizuar për të kryer vrasjen. Por për shkak se këta persona u armatosën me kallashnikovë dhe qëndruan në pritje që të ekzekutonin Plakun sapo të dilte nga komisariati, Gjermeni i çoi një tjetër mesazh Algert Rapit duke i thënë se Plaku ishte liruar edhe pse në të vërtetë ai gjendej ende brenda.
Sipas dosjes hetimore, konflikti mes të fortit të Sukthit Rexhep Rapi dhe Xhevdet Plaku ka bazë hakmarrjen. Në vitin 2000 ne Savona të Italisë është vrarë me armë zjarri, një familjar i Rexhep Rapit, ekzekutim që dyshohet te jetë kryer nga Xhevdet Plaku dhe një person tjetër, për shkak të konflikteve për trafik narkotikësh dhe qeniesh njerëzore.
Rexhep Rapi u vu në pranga të premten nga policia dhe ndodhet tashmë nën masën e sigurisë arrest në burg. Miku i tij Dejvi Gjermeni është arrestua ne Holandë, ndërsa ish oficeri i policisë Dedan Gjoni që rezulton i përfshire në këtë ngjarje kriminale është vënë në pranga gjate një operacioni të SPAK, disa javë më parë.
