Festat e fundvitit kanë rritur ndjeshëm numrin e shtetasve shqiptarë që rikthehen në vendlindje për të kaluar ditët e festave.
Gjatë 24-orëve të fundit në pikën kufitare të Kapshticës kanë hyrë 3243 shtetas, ndërsa 1686 janë regjistruar në dalje.
Sipas Policisë Kufitare në Gjirokastër, gjatë 24 orëve të fundit nëpërmjet doganës së Kakavijës kanë hyrë në tokën shqiptare 4 545 persona dhe 1 284 automjete. Një rritje e lëvizjes konstatohet edhe në drejtim të Greqisë ndërsa për në shtetin fqinj në 24 orë kanë udhëtuar 2 075 persona dhe 705 automjete.
Për të përballur këtë fluks në rritje të qytetarëve që hyjnë në vendin tonë, pala shqiptare ka rritur numrin e sporteleve duke i alternuar më pas në varësi të situatës.
Fluksi më i lartë pritet të regjistrohet në fundjavë, në vigjilje të Krishtlindjeve e më pas në ditët e fundit të vitit.
