Familjarët e protestuesve të arrestuar gjatë natës në Kukës kanë mësyrë para ambienteve të komisariatit ku mbahen të arrestuar 23 persona.
Deri më tani Prokuroria e Kukësit ka lëshuar 36 urdhër-arreste, ndërkohë që janë prangosur 23, ku po mbahen të izoluar. Sipas protestuesve, policia ka ardhur në shtëpitë e tyre natën për të arrestuar pjesëmarrësit në këtë protestë dhe thonë se efektivët e policisë kanë ushtruar dhunë nëpër banesa. “Kanë ardhur me maska e na kanë trajtuar si kriminelë”, shprehen ata, duke kërkuar lirimin e të arrestuarve.
Nga ora në orë turma para komisariatit po bëhet mjaft e madhe, ku më të revoltuarit janë familjarët e të arrestuarve. Ndërkohë nuk mungojnë edhe persona të tjerë që u janë bashkuar atyre dhe herë pas here thërrasin kundër qeverisë dhe kërkojnë lirimin e të arrestuarve. Ndonëse nuk ka prani të FNSH-së pranë komisariatit, një pjesë e efektivëve të forcave special qëndrojnë në distancë, të gatshëm për të ndërhyrë nëse situata degradon.
