GJKKO ka nisur gjykimin për kryebashkiakun e Rrogozhinës Edison Memolla. Ai nuk ishte i pranishëm në seancën e zhvilluar ditën e sotme por u përfaqësua nga avokati i tij. Kujtojmë se akuza ndaj tij u ngrit pasi nga akuza u provuan favorizime në këmbim të votës në zgjedhjet e pjesshme lokale të 6 marsit.
Memolla akuzohet nga SPAK për veprën penale “Korrupsioni aktiv në zgjedhje” kryer në bashkëpunim. Për çështjen, akuzohen dhe tre persona të tjerë: Ndriçim Tafxhafa i cili akuzohet për kryerjen e veprës penale “Korrupsioni aktiv në zgjedhje”, Blerim Xhamani i cili akuzohet për kryerjen e veprave penale “Korrupsioni aktiv në zgjedhje” dhe “Falsifikimi i dokumentave” të dyja të kryera në bashkëpunim, si dhe Isuf Tosku për kryerjen e veprës penale “Falsifikimi i dokumentave” kryer në bashkëpunim.
SPAK ka njoftuar më herët se ky procedim penal është regjistruar pas transmetimit në rrjetet televizive të një regjistrimi audio, ku Edison Memolla ndikon tek shtetasi Blerim Xhamani–elektriçist pranë FSHU (Furnizuesi i Shërbimit Universal) Durrës, dega Rrogozhinë, për të mos i ndërprerë energjinë elektrike një abonenti debitor, me qëllim për të votuar në favor të tij në zgjedhjet e pjesshme lokale të datës 06 prillit 2022. I pandehuri tjetër Ndriçim Tafxhafa, i ka premtuar një shtetaseje për shlyerje të detyrimeve ndaj OSHEE dhe për strehim, duke i kërkuar të votonte në favor të Edison Memollës. Ndërsa, të pandehurit Blerim Xhamani dhe Isuf Tosku kanë falsifikuar të dhënat në procesverbalin e ndërprerjes së energjisë elektrike, duke paraqitur të dhëna të rreme, pasi nuk ia kanë ndërprerë faktikisht energjinë elektrike abonentit debitor.
Regjistrimi i bisedës telefonike është bërë në prag të zgjedhjeve të pjesshme të 6 marsit 2022. Memolla është kapur në një audio-përgjim, duke ndërhyrë tek OSHEE për të mos i ndërprerë energjinë elektrike një familjeje të varfër. Në një bisedë telefonike me një grua, Memolla konfirmon se ishte takuar më herët me telefonuesen, të cilës i kishte garantuar mos-ndërprerjen e energjisë, në këmbim të votës për zgjedhjet e 6 marsit. E më pas në telefon del elektricisti që kishte shkuar për ndërprerjen e energjisë, të cilit Memolla i kërkon që të mos ia ndërpresë energjinë. Memolla e orienton elektricistin që pasi të kalojnë zgjedhjet mund të vepronin. Në një moment, mendohet se kryebashkiaku i referohet kryeministrit Edi Rama teksa i thotë elektricistit të OSHEE-së: “Të flas me Edin unë, të flasi me ato të mëdhenjtë që të mos ju bezdisin”.
